सिमेंट पाईप ( अभंग रचना )

सिमेंट पाईप I शिल्लक राहिला ॥

रस्त्याच्या कडेला | एकटाच ॥१॥

मिळण्या निवारा | ताबा तो घेतला ॥

त्यातच थाटला | हा संसार ॥२॥

वन रूम पहा I किचन त्यातच ॥ 

ताट दुरडीत | उघडेच ॥३॥

तीन लेकरांचा I कराया सांभाळ ॥

उसनेच बळ | कुठवर ? ॥४॥

वर लटकती I उघड्याच तारा ॥

आंधळा तो वारा I आयुष्यात ॥५॥

फाटकी चटई | जणू गच्चीवर ॥

शोधते नजर I शून्यातच ॥६॥

भुकेले ते पोट I उखड बसून ॥

धरतो दाबून I पहाटेच ॥७॥

नाही दाना पानी I नाही स्वयंपाक

चावतसे लेक | कुटकेच ॥८॥

कपडे अंगात I धुतले केंव्हा ते ?॥

पावसातच ते I भिजलेले ॥९॥

देश हा माझाच I हक्क माझे सारे ॥

कोण तो नाकारे ? I कळेचना ? ॥१०॥