ಬಿನ್ನಹ
ಬಿನ್ನಹ
ಇದೋ ನನ್ನ ಬಿನ್ನಹ ನಿನಗೆ
ಮುದದಿ ಆಲಿಸೈ ಹೇ ದೇವಾ
ಆದರಿಸಿ ಕೇಳ್ವೆನೊಂದು ವರವ
ಸಾದರದಿ ನೀಡುವುದೆನಗೆ
ಭೂದೇವಿ ಕಂಪಿಸುತಿಹಳು
ನಿರ್ದಯದಿ ಸಾಯುತಿಹರು ಜನರು
ಮರ್ಧಿಸುತ ಕೆಟ್ಟ ಕರೋನಕೀಟಗಳ
ಉದ್ಧರಿಸಿ ಕಾಯ್ವುದು ಜನಪದರ
ರೋಸಿಹೋಗುತಿಹರು ಜನರು
ಉಸಿರಾಟ ನಿಲ್ಲುತಿಹುದು ಕ್ಷಣಕ್ಷಣವೂ
ಬಸಿದು ಹೋಗುತಿದೆ ಹಣವು
ಕುಸಿದು ಹೋಗುತಿದೆ ಬದುಕು
ಕಾಣದ ಕೀಟಾಣುಗಳ ಆರ್ಭಟ
ರಣಭೇರಿ ಬಡಿತ ಕಿವಿಗಡಚಿಕ್ಕುತಿದೆ
ಹೆಣಗಳ ಸರದಿ ಬೆಳೆಯುತಿದೆ
ಹಣವು ನರ್ತಿಸುತಿದೆ ಕುರುಡಾಗಿ
ಹೈರಾಣವಾಗುತಿದೆ ಬದುಕು
ಪುರದ ಜನರ ದಿಕ್ಕೆಡಿಸಿದೆ
ಅರಿಯದಾಗಿದೆ ಭವಿತವ್ಯ
ದಾರಿ ತೋರೆನಗೆ ಹೇ ದೇವಾ