તમારી હાજરીમાં

થાય છે કેવું તમારી હાજરીમાં,
બૂટને વાળી દઉં છું વાધરીમાં !

મારી મંઝિલ મારી સાથે ચાલવાની,
તું જો હો સાથે સનમ મુસાફરીમાં.

એમની બારી બરોબર થઈ જવાને,
ઠેકડો મારી ચડ્યું દિલ છાપરીમાં !

કાંકરી જળમાં જો નાખો, શું નવાઈ ?
એકદા નાખી જુઓ જળ કાંકરીમાં !

ઘોડિયામાં પગ જુઓ ડોકાય રાતાં,
બાળપણ રણઝણ થતું શું ઝાંઝરીમાં !

વેલણેથી પાડતી ટોચા લૂવા પર,
બા હજુ દેખાય મુજને ભાખરીમાં.

તેં દીધેલું મોરનું પીંછું રડે છે,
શું કહે 'નિનાદ' બીજું ખાતરીમાં ?