વિદાયની વસમી વેળાએ

ઉંબરો વળાવવા ન આવોજો પિતા,

વસમી આ વેળાને,

તમારાથી નહીં જીરવી શકાય

તમારાં શમણાઓને,

આંખમાં આંજીને નીકળી છું હું પ્રવાસમાં,

નદી જેમ વહી જઇશ, વસમી આ વેળાને

તમારાથી નહીં જીરવી શકાય,

આખરી વેળાએ જો એક ડૂમો ભરશો,

તો કદમ મારાં અટકી જશે જોવાને તમને,

અને લગાડશો ગળે, તો છૂટા નહીં પાડી શકાય,

વસમી આ વેળાને,

તમારાથી નહીં જીરવી શકાય,

આંખમાં આંખ પરોવીને ન જોજો પિતા,

ન પાડજો બૂમ મારા નામની પિતા,

વરસોથી સાચવેલાં આંસુઓનાં ટોળાંને,

નહીં રોકી શકાય, વસમી આ વેળાને

તમારાથી નહીં જીરવી શકાય.