ઊગીને આથમી જાવું
ઊગીને આથમી જાવું
1 min
13.6K
ઊગીને આથમી જાવું ને ઊભરાઈ શમી જાવું;
રમકડું અેના હાથોનું છીએ, અેથી રમી જાવું.
બને ક્યારેક અણગમતું કશું તો સમસમી જાવું;
પછી સ્વીકારવું ખુલ્લા દિલે, સઘળું ખમી જાવું.
ડૂમો થઈને ઘણું સચવાઈ જાતું હોય છે તો યે,
રહે છે ફાયદામાં સ્હેજ આંખોનું ઝમી જાવું!
અમે અસ્તિત્વ પામ્યા આગિયાનું એટલે સમજ્યાં!
મળે જો રાત અંધારી તો થોડું ટમટમી જાવું.
જીવન જીવવાની ફિલસૂફી બહુ સહેલી ને સાદી છે,
કદી પળવાર માટે કોઈને થોડા ગમી જાવું.
મને શીખવા મળ્યું છે એક ઊંચા વૃક્ષ પાસેથી,
કે ઝંઝાવાતમાં ટકવાનો રસ્તો છે, નમી જાવું.