ગરીબનું ચોમાસું

ગરીબને મન; વરસાદ હોય તો; ઘરમાં

ને, ના હોય તો આંખે પાણી

છત વરસતી અંદર; બાહર છત્રી કાણી

આમાં શું કરે ઉજાણી!

 

બાહર થોડો ને ઘરમાં ભરપૂર

ભીતર કોરા ને આંખોમાં પૂર

ડબ્બા ખાલી ને ચૂલામાં પાણી

આમાં શું કરે ઉજાણી!

 

ધારો કે વરસે ના એકે ટીપું

તોયે ખાલી રે શાકનું છીકું

હાડમારી તો હૈયે કોરાણી

આમાં શું કરે ઉજાણી!

 

મોસમ તો બસ માલદાર માણે

રાંકને મન તો રોટલો ટાણે;

એ જ બરમાસ કહાણી

આમાં શું કરે ઉજાણી!