બ્હાર આવ્યા આપણે

ચકચકિત જ્યાં કાચમાંથી બ્હાર આવ્યા આપણે;

રોજના વનવાસમાંથી બ્હાર આવ્યા આપણે.

સૂર્ય શીતળતા મઢાવી ત્યારથી ઊગતો થયો;

જ્યાં સળગતી જાતમાંથી બ્હાર આવ્યા આપણે.

યુગ જૂનો ઓઢ્યો હતો એ અંચળાને ફેંકતા--

થાક; ઠંડક; ઠાઠમાંથી બ્હાર આવ્યા આપણે.

પળમહીં પ્રગટી ગયું ખાખીપણાનું જ્યાં ખલક--

મુલ્ક મેલાદાટમાંથી બ્હાર આવ્યા આપણે.

લોક જે શ્વસતા હતા એ સર્વ શ્વાસો સાધતા--

જાણે લોકો લાખમાંથી બ્હાર આવ્યા આપણે.

એક બાજું રોટલાનું સત્ય; બીજું ભૂખનું--

બેઉંના સંઘર્ષમાંથી બ્હાર આવ્યા આપણે ?

જ્યાં પચાવી જાણતા સીસા સમા શબ્દો થયા;

જાળ ને જંજાળમાંથી બ્હાર આવ્યા આપણે