પિતાને સલામ
પિતાને સલામ
નવ નવ માસ રાખે ઉદરમાં સાચવી,
એ માતાને કોણ ભૂલે છે,
એ માને જીવથી વધું સાચવનાર,
પિતાને પણ સલામ છે.
જન્મ આપે છે સહી અઢળક વેદના,
એ જનનીને કોણ ભૂલે છે,
ચિંતામાં અહીં તહી આંટા મારનાર,
પિતાને પણ સલામ છે.
દૂધ પીવડાવે ચાંપી છાતી સરસો,
એ માતાને કોણ ભૂલે છે,
લોહી સીંચીને પણ કરે છે ઘડતર,
એ પિતાને પણ સલામ છે,
રાતભર ભિનામાં રહી સુવડાવે સુકે,
એ માતાને કોણ ભૂલે છે,
એ રાતોમાં ઘડી ઘડી જાગનાર,
એ પિતાને પણ સલામ છે,
પાપા પગલી કરાવી ચાલતાં શીખવનાર,
એ માતાને કોણ ભૂલે છે,
ખભે બેસાડી દુનિયા દેખાડનાર,
એ પિતાને પણ સલામ છે,
શાળાએ જતો જોઈ હરખાઈ જનાર,
એ માતાને કોણ ભૂલે છે,
બંનેને જોઈ મુછમાં મલકાઇ જનાર,
એ પિતાને પણ સલામ છે,
સાચાં ખોટાનાં ભેદ પરખાવનાર,
એ માતાને કોણ ભૂલે છે,
બની પથદર્શક રાહ ચીંધનાર,
એ પિતાને પણ સલામ છે,
બધાને સાથે રાખી સુખ આપનાર,
એ માતાને કોણ ભૂલે છે,
દુઃખમાં આગળ સુખમાં પાછળ રહેનાર,
એ પિતાને પણ સલામ છે,
જેણે બનાવ્યું સુંદર આ જગત,
એ માતાને કોણ ભૂલે છે,
જેમના આપણે અંશ છીએ,
એ પિતાને પણ હજાર સલામ છે.