બચલી ડોસી

બચલી ડોસી સો વરસની તોય હજુએ જીવે,

ઝળેલ સાડલે બખિયા મારી જીવતર આખું સીવે.

 

ઘાઘરી-પોલકું મીંડલે વીંટી

ઝૂલે આંબા ડાળે,

શૈશવ આખું છબ્બો છબ્બો

પાંચીકે ઉછાળે,

નોંધારી ભીંત્યુંને ટેકો આપ્યો'તો એક દીવે,

બચલી ડોસી સો વરસની તોય હજુએ જીવે.

 

બોખાં મોંએ ચગળાતું આ

ગળચટ્ટું જોબન,

ઓરડાનું અંધારું ઓઢી

છૂટું મેલ્યું ધન,

બારસાંખના તોરણ સઘળાં ફૂલો થઈને ખીલે,

બચલી ડોસી સો વરસની તોય હજુએ જીવે.

 

દાણા-છાણાં વીણીવીણી

સેવી નીજની આંખો,

ઊડી ગઈ ગઢપણની આશા

ફૂટી જ્યાં બે પાંખો,

થૂ-થૂ-થૂ-થૂ ખારી-કડવી એકલતાને પીવે,

ઝળેલ સાડલે બખિયા મારી જીવતર આખું સીવે