એવી જનનીની છે આ કહાણી
એવી જનનીની છે આ કહાણી
એવી જનનીની છે આ કહાણી,
આંચળમાં છે દૂધ ને આંખોમાં છે પાણી…
જેના માટે જ ‘મા તે મા,
બીજા બધા વગડાના વા’
એવી ઉક્તિ કહેવાણી… એવી જનનીની છે આ કહાણી…
હર હમેંશ માયા, મમતા,
સ્નેહ, લાગણી, ચિંતા ને
પ્રેમની ફૂટતી સરવાણી… એવી જનનીની છે આ કહાણી…
અસર કોઈપણ ઋતુની
જેના મુખ પર ક્યારેય
પણ નથી વરતાણી… એવી જનનીની છે આ કહાણી…
બાળપણમાં પિતા, પતિ
યુવાનીમાં, ને ઘડપણમાં
સંતાનોના નામે ઓળખાણી… એવી જનનીની છે આ કહાણી…
સર્વસ્વ અર્પણ કરીને
સ્વનું, સ્વજનોના જ
સુખ:દુખના રંગે રંગાણી… એવી જનનીની છે આ કહાણી…
ક્યારેક માતૃત્વની ભાવનાને
વિસારે પાડીને, વૃધ્ધાશ્રમની
વાટ પણ એને બતાવાણી… એવી જનનીની છે કહાણી…
તેમ છતાં, ‘ખમ્મા મારા લાલ’,
જેવા આશિર્વચનો છે રોમેરોમમાં
એ ગાથા પણ છે પંકાણી… એવી જનનીની છે આ કહાણી…
કરજ જેના દૂધનું, નથી
ઉતર્યું ને નથી ક્યારે પણ
ઉતરવાનું, એવી સત્ય છે વાણી… એવી જનનીની છે આ કહાણી…
એવી જનનીની છે આ કહાણી,
આંચળમાં છે દૂધ ને આંખોમાં છે પાણી.......