હવેલી
હવેલી
1 min
13.5K
ગામ છેવાડે હવેલી યાદ છે ને?
ને તને પણ એ ગમેલી? યાદ છે ને?
આંગણામાં આપણો એ બાગ પ્યારો,
એ બગીચે તું રમેલી યાદ છે ને.
મેઘ સાથે વીજળીના એ કડાકે,
તું મને વળગી ગયેલી યાદ છે ને ?
ગાલ પર તેં કરેલું એક ચુંબન,
પાંપણો તારી ઢળેલી યાદ છે ને ?
જે ખભાનો તું હતી ટેકો સદાયે,
એ ખભે શાયદ રડેલી યાદ છે ને ?
અશ્રુ પડતાં હોય મારા ક્યાંક છાનાં,
તેં હથેળીને ધરેલી યાદ છે ને ?
થાય ઉંબર કૈંક ઊંચો દેખ ઘરનો,
ને પછી તું ના વળેલી યાદ છે ને ?
ચાર ભીંતોનું રહેલું ઘર હવે તો,
જ્યાં વ્યથાઓ બચેલી યાદ છે ને ?
ને થયા પાયા ઘણા પોચા ધરામાં,
હચમચીતી એ હવેલી યાદ છે ને ?