આવે નવું વર્ષ

આવે નવું વર્ષ લઈને સમયનો સથવારો,

આવે નવું વર્ષ ભૂલાવી દુઃખની વણજારો.

સ્નેહની સુંવાળપને વળી પ્રેમતણું પાથેય,

આવે નવું વર્ષ મનાવી ઉત્સવને તહેવારો.

ગઈકાલ ભૂત બનીને અતીતમાં ધરબાતી,

આવે નવું વર્ષ સુધારી આજનો દિન સારો.

ઇશને માનવ થતા નથી જોયા કોઈ કાળે,

આવે નવું વર્ષ વિચારી માનવે એનો વર્તારો.

આશાની બાંધી ઇમારત સોણલાં સજાવે,

આવે નવું વર્ષ તૈયારી પુરુષાર્થ હો સૈયારો.