શબ્દોનું વાવેતર
શબ્દોનું વાવેતર
1 min
6.7K
વીંખી-ફેંદી હૈયાસ્પર્શ્યું લોક લોકનું જીવતર,
દલડે-દલડે સ્પંદન કરતાં શબ્દોનું વાવેતર.
અશ્રુજળના સિંચન સીંચી
હેતે ધરતાં છાંયું જી,
ટેરવેથી ટશરોને ફોડી
લોહીભીનું ગીત ગાયું જી,
હૃદયે હૃદયે મ્હોરી ઊઠ્યાં શમણાંના લ્હેરાતાં ખેતર.
દલડે-દલડે સ્પંદન કરતાં શબ્દોનું વાવેતર.
કૌતુકછલકી આંખો દોડી
લાગણીઓને લણવા જી,
આંગળીઓને ફૂટી વાચા
ગઝલોને ગણગણવાજી,
જીભના શેઢે ટહુકી ઊઠ્યાં કોયલ મોર બપૈયા તેતર.
દલડે-દલડે સ્પંદન કરતાં શબ્દોનું વાવેતર