એકાદ છમકલું કરવાની

આખા દરિયા ના ડહોળું પણ એકાદ છમકલું કરવાની,

હું આખી ધરતીને માથે લઇ માર્ગ વચાળે મળવાની.

નાવ બનાવી આજ હલેસા કીધાં છે મેં કાગળ ફાડી,

આ આકાશે વાદળની ભીતર હોડી લઇને તરવાની.

થોડું ઠહેરી આખાય મલકની વાતો મારે કરવી છે,

સૂરજ સાથે ધીમું ધીમું હું રોજ ભલેને બળવાની.

પંખી થઇને ઉડતા ઉડતા ઊંડું ભાળી અચરજ પામું,

સાગરની પેટીમાં તારલિયા તોડી હું તો ભરવાની.

સ્હેજ ધકેલું તો કેવાં એક પછી એક સરકતા જાશે,

મણકાઘોડીમાં કંકર લઇને મોજ પડે છે ગણવાની.

પર્વત પરથી ઊંચા ઊંચા ધોધ પડે ત્યાં મોજ ઘણી છે,

ગોફણમાંથી છૂટે પાણો એવુંય ધબાધબ પડવાની.

'ને સંતાઈને બેસી જાઉં હું રાઈનાં દાણામાં,

શોધ કરે છે લોકો મારી ક્યાંથી કોઈને જડવાની.