સમાધી ચડે છે

 હવે તો બરાબર સમાધી ચડે છે;

પછી ઝીણાં મોતીડાં ઝરમર ઝરે છે.

પ્રથમ ચમકે છે વીજ,'ને મેઘ ગરજે;

પછી ધ્યાની અધ્ધર'ને અધ્ધર ચડે છે.

અહીં થાય છે ધમપછાડા ઘણાંયે,

છતાં સાધુજન ક્યારે આમાં પડે છે?

અગમ 'ને અગોચર તરફ નીકળેલા,

અગોરીને ક્યારે દુઃખો શું નડે છે ?

પદાર્થ કયો છે જગતમાં નકામો ?

અહીં માનવી માનવી પર પડે છે.

પરમ તત્વ સ્વયં આ કાયામહીં છે;

છતાં શોધ ઇશ્વરની ક્યાં ક્યાં કરે છે?

જશે વાત પાછી અવળ મારગે પણ;

'વિજય' શાને અમથા ડખામાં પડે છે?