કેસૂડો ઘોડે ચડીને...

કેસરી સાફો ચડાવી આવે છે દરબારમાં,
કેસૂડો ઘોડે ચડીને હણહણે કુંજારમાં?

હર્ષઘેલી થૈ ચમેલી, રાતરાણી ને જૂઈ,
ફાગણી ગીતોની લ્હાણી, લ્યો કરે સંસારમાં.

કેફ જાનૈયા પવનનો સાવ નોખો ને છતાં,
સ્હેજ પણ લથડ્યા વિના પોંખાય શિષ્ટાચારમાં.

એક હોલિકા બળે ઇલાજ એનો થાય પણ,
રોજ બળતી કૈં અહીં લાચાર નર્કાગારમાં.

હો નશો જો ભાંગનો ‘પ્રજ્ઞા’ હજી પણ ઊતરે,
કેફ શબ્દોનો ચડે, શું ઊતરે પળવારમાં!?