જિંદગીના મંચ પર મંચન

ભૂમિકા ’ગર ખોટી હો તો કૈં રીતે બદલાય પણ,
ને સમજની બહાર હો તો કૈં રીતે સમજાય પણ.

જિંદગીના મંચ પર મંચન કર્યું છે એટલે,
કૈં અદા પંકાય પણ ને કૈં અદા વંકાય પણ,

એટલું સ્વીકારી જે, ચાલ્યાં બધાં સુખી થયાં,
ભલભલાં ઉપર ચડી નીચે સુધી પટકાય પણ.

વૃક્ષ ટહુકાને પૂછે, 'ગર ના રહું હું એ પછી?'
શ્વાસમાં કાર્બન ભરીને કઈ રીતે જિવાય પણ !

સાવ સૂની શેરીના સૂનકારને રણકાવવા,
ક્યાંકથી ગબડે લખોટી મન ભલાં હરખાય પણ.

સ્થિર થાવાને મથો પણ યોજના ખોટી ઠરી,
હો ન ‘પ્રજ્ઞા’ સાથ તો આ જિંદગી પછડાય પણ.