હું કેમ સમજાવું?

રગેરગ ખોતરે પીડા તને હું કેમ સમજાવું?

ફરે અંદર ફરે પીડા તને હું કેમ સમજાવું?

હવે તો અેક ટુકડો શ્વાસનો કેવળ બચેલો છે;

નિરંતર કોતરે પીડા તને હું કેમ સમજાવું ?

નથી ચ્હેરા ઉપર હું આવવા દેતો હસી લઈને;

છે કાયમ ભીતરે પીડા તને હું કેમ સમજાવું?

તું ભાષા જાણતી ના હોય તો અે દોષ તારો છે;

હજી ટહુકા કરે પીડા તને હું કેમ સમજાવું?

બળદ માફક ખરેખર આપણે તો જીવવાનું છે;

યુગોથી જોતરે પીડા તને હું કેમ સમજાવું?