કાગળ પછી કોરો રહ્યો...
કાગળ પછી કોરો રહ્યો...
ઓરતાં ઝાઝાં, સમય ઓછો રહ્યો,
ઊંઘમાં પણ રાતભર રોતો રહ્યો.
શ્વાસની બસ આવ-જા ચાલ્યા કરી,
જીવ તનથી પ્રેમમાં નોખો રહ્યો.
અન્ય પર છાંયો કર્યો ને ખુદ શિરે,
સર્વદા તડકાંનો બસ બોજો રહ્યો.
યાદમાં બેઠો ગઝલ લખવા અને-
હાથમાં કાગળ પછી કોરો રહ્યો.
દીપ બૂઝાયો, તિમિર પ્રગટ્યું બધે,
યાદ વિસરાતાં સુધી સોપો રહ્યો.
ધર્મ કાજે જિંદગી અર્પણ કરી,
સંતનો તેથી સદા મોભો રહ્યો.
છળ-કપટ સર્વે જગતનાં જાણતો,
'વીર' શિવ શા કારણે ભોળો રહ્યો ?