આ દુનિયાએ

જેણે દાઝયા ઉપર ડામ દીધા છે આ દુનિયાએ,

અમી આંચકી વિષઘૂંટને પાયા છે આ દુનિયાએ.

પોતાનાં જ થૈ પારકાંને ઉગામતાં શસ્ત્ર સન્મુખ,

હતાં જે હક્કનાં ઝૂંટવીને લીધાં છે આ દુનિયાએ.

હાજરીમાં થતી વાત મધમીઠીને સરાહના વળી,

પીઠ પાછળ કાવાદાવા ખેલ્યાં છે આ દુનિયાએ.

જશરેખા તો જાણે કે જડમૂળથી નાખી ભૂંસી,

અપજશને આરોપોને મૂક્યાં છે આ દુનિયાએ.

સ્વાર્થરત થઈને કેવા કેવા પ્રપંચો રચ્યા જેણે,

હક્ક લઈ ફરજને કેવી ચૂક્યાં છે આ દુનિયાએ.

ભણાવજે પાઠ એવા પશુથી બદતર માનવીને,

બીજાના ઉપકારોને એ ભૂલ્યાં છે આ દુનિયાએ.