હોય તો?

જે ધારો એ કરાતું હોય તો?
બધું ગજવે ભરાતું હોય તો?

ગમે એ યાદ હંમેશા રહે,
ન ગમતું વિસરાતું હોય તો?

ડરે છે માનવીથી માનવી,
પ્રભુથી પણ ડરાતું હોય તો?

ગમે ના જો કશું બાહર કદી,
ભીતરમાં હિજરાતું હોય તો?

આ ગૂમડું જેમ ખોતરીએ છીએ,
જીવન પણ ખોતરાતું હોય તો?

જરા શી ફૂંક હળવે મારીએ,
ને વાદળ વિખરાતું હોય તો?

સૂરજની જેમ પણ ઊગી શકો,
ફૂલો માફક ખરાતું હોય તો?

અહીંથી સ્વર્ગની સીડી ચડી,
ને વળતા ઊતરાતું હોય તો?

લઈને રંગ આ ફૂલો તણા,
પવનથી ચિતરાતું હોય તો?

જીવ્યાં પહેલાં જીવી શકીએ 'નિનાદ',
મર્યાં પહેલાં મરાતું હોય તો?