ના જડ્યા

આજે તારી ગઝલ કરવા બેઠી 'મા' પણ

વર્ણવી શકે તને એવા શબ્દોજ ના જડ્યા!

 

જન્મ મારો ને પીડા તારી 

પ્રેમને એ સમાવી શકે એવા છંદો જ ના જડ્યા!

 

માંદગી મારી ને ઉજાગરો તારો 

થાક ને એ બિરદાવી શકે એવા અલંકારો જ ના જડ્યા!

 

ઈજાઓ મારી ને વેદનાઓ તારી 

લાગણીઓને એ નિરૂપી શકે એવા રૂપકો જ ના જડ્યા!

 

મેં કહ્યું તે સાંભળ્યું; જે ના કહ્યું તે પણ સાંભળ્યું 

સમજણને એ સમજાવી શકે એવા મુહાવરા જ ના જડ્યા!

 

સફળતા મારી ને પરસેવો તારો 

ઉપકારને એ વધાવી શકે એવા પુષ્પકો જ ના જડ્યા!

 

જીવન ભલે મારુ પણ સંઘર્ષ તો તારોજ 

ત્યાગને એ સન્માની શકે એવા લય ને તાલ ના જડ્યા!

 

આજે તારી ગઝલ કરવા બેઠી 'મા' પણ 

વર્ણવી શકે તને એવા શબ્દો જ ના જડ્યા!