શું છે?

આરઝુ શું છે જુસ્તજુ શું છે?

એની સાથે આ ગુફ્તગુ શું છે?

હોઠ પર એ જ સતત આવે છે

નામ એનું ભલા નામનું શું છે?

એના ચહેરાની બધે છે આભા

ભોર શું છે કે ભાસવું શું છે?

શ્વાસ ઉચ્વાસ તરબતર મારા  

ફુલ શું છે આ રંગો-બૂ શું છે?

એની યાદોની હુંફ સાથે છે

તાપ શું છે અને તાપણું શું છે?

ઘેન જેવું જ રહે છે કાયમ

એમની આંખનો, જાદુ શું છે?

ચોતરફ એના બધા ચહેરાઓ

રૂબરૂ છે કે આ શમણું શું છે?

નામ એનું જ લઇ તરવાના

તાણ શું છે અને તારાનું શું છે?

વાત પણ વાયરો થઇ છે હનીફ

સાચું કહેજે આ ગુફ્તગુ શું છે?

આ ગઝલથી જ પ્રસિદ્ધિ થઇ છે હનીફ

એ વગર તારી આબરૂ શું છે?