એ કામ માળીએ જ સમજાવી જવા જેવું હતું
એ કામ માળીએ જ સમજાવી જવા જેવું હતું
1 min
14.1K
એ કામ માળીએ જ સમજાવી જવા જેવું હતું,
તું ફૂલ છો, સૌરભને પ્રસરાવી જવા જેવું હતું.
કુદરત ઉછેરે છે બધું એ વાત પર શ્રદ્ધા ધરી,
જે બીજ આવે હાથ, એ વાવી જવા જેવું હતું.
ઝાકળ તણો જાદુ અગર, જો ફૂલને મંજૂર હો,
તરકટ પછી તડકા તણું, ફાવી જવા જેવું હતું.
મારાં ચરણ, તારાં તરફ, વળતાં નથી હું શું કરું ?
મારે જ તારા ધામમાં, આવી જવા જેવું હતું.
અહલક પળે કો ભીતરે, સાકાર થાયે એ ઘડી,
છોડી જગતની આંગળી, ચાલી જવા જેવું હતું.
એ રણ હશે કે ઝાંઝવાં કે એ હશે છલના નરી,
એ જે હશે એને ય તરસાવી જવા જેવું હતું.