થયું છે,

કબૂતર ઉડ્યા છે તો સાબિત થયું છે,
જગત ક્યાંકથી રક્તરંજિત થયું છે.

બગીચેથી એવું પ્રસારિત થયું છે,
આ ઝાકળ ફૂલોથી વિવાહિત થયું છે.

આ પડછાયો મારો બને છાંયડો બસ,
મને સ્વપ્ન એવું અપેક્ષિત થયું છે.

બધા યે દીવો પોતપોતાનો કીધો,
શું અજવાળું સાચ્ચે ઉપસ્થિત થયું છે?

વિરહ તો હતો ને ઉપેક્ષા ઉમેરાઈ,
આ ખંડિત હતું મન, વિભાજીત થયું છે.

બધી ડાળ પર સાંભળ્યો જ્યારે કલરવ,
પછી ઝાડનું મન પ્રફુલ્લિત થયું છે.

મેં મારામાં માણસપણું જ્યારે શોધ્યું,
પછી જે લખ્યું તે સુભાષિત થયું છે.