તો ના કઇ રીતથી કહેવી ?

મને જાતે જ બહેકાવી, તો ના કઇ રીતથી કહેવી ? 

કહ્યું: "લે જાતને તાવી" - તો ના કઇ રીતથી કહેવી ?

હતી પૂરી ઝનૂની, દર્દને પીડાની મા થઈને,

ગઝલ વર્ષો પછી આવી તો ના કઇ રીતથી કહેવી !

મજૂરી રાત દિ', ને મહેનતાણામા પીડા મળતી,

ગઝલ એ નોકરી લાવી, તો ના કઇ રીતથી કહેવી.

હું સાવધ છું જ, તો પણ મન સતત તમને જ ઝંખે છે,

લીધો એ રાહ અપનાવી, તો ના કઇ રીતથી કહેવી ?

તું 'નેહા' છો ? તો બસ, દુનિયાને ચાહ્યા કર ક્ષમાભાવે,

હ્યદય એવું દે પરખાવી તો ના કઇ રીતથી કહેવી ?