એકધારું ચાલવાનું હોય છે
એકધારું ચાલવાનું હોય છે
જિંદગીમાં એકધારું ચાલવાનું હોય છે,
બાળપણને મનભરીને માણવાનું હોય છે.
વાત શૈશવની કરું શું ? ચાંદ-તારા, રાતને,
એક પરીની વારતામાં મ્હાલવાનું હોય છે.
જાગરણને એ યુવાનીની ખુમારી ખાટલે,
સ્વપ્ન જોવા રાત આખી જાગવાનું હોય છે.
પાનખર આવે પછી પણ બાગ મ્હેંકી ઉઠશે
છેવટે મૌસમ બનીને ખીલવાનું હોય છે.
કેટલું ચડવું પડે છે જિંદગીની ચાહમાં,
જીવતરને બેઉ હાથે પોંખવાનું હોય છે.