ઈરાદો
ઈરાદો
ઈશ્કમાં નેક ઈરાદો હૃદયનો પરખાય પછી આવજે,
ને ખામોશ સાદ મારી ધડકનનો સંભળાય પછી આવજે !
આ કંદરાઓમાં ગુંજી રહ્યો હુંય જન્મોથી એક જ ઈરાદે,
જો તારા ખાલીપાનું મૌન તારામાં પડઘાય પછી આવજે !
સદા સાદગીનાં સૌંદર્યને જ ચાહવાનો ઈરાદો હતો મારો,
શણગાર તારો જોઈ ખુદ અરીસો શરમાય પછી આવજે !
બધી જ ગઝલો લખાઈ છે તારી ચાહતના બુલંદ ઈરાદે,
બે શબ્દો વચ્ચે ચહેરો મારો તને દેખાય પછી આવજે !
સ્થિરતા મહીં ભટકનમાં શોધ તારી જ છે, કોણ સમજશે?
ને ખુદ મને પામવાના સરનામા અટવાય પછી આવજે !
કૂંપળો મિલનની ફૂટી છે મારા ઈરાદાઓના ગુલશનમાં,
તારી રંગીન આરઝૂઓનો બાગ મુરઝાય પછી આવજે !
એક "પરમ" ઈરાદો તને હૃદયથી પામવાનો મારો જન્મોથી,
જ્યારે મારૂં આ "પાગલ" પન તને સમજાય પછી આવજે !