પળો પાછી લાવીએ

લાઈટ બિલના પેલા કાળા કાગળ લઈને, 

આખા ફળિયાને દોડાવીએ, 

એ પળો પાછી લાવીએ.

બે રૂપિયાનાં દહીં હાટુ થઈ, 

આખુ ગામ ફરી આવીએ, 

એ પળો પાછી લાવીએ.

દોસ્તની સાઈકલ પાછળ બેસી, 

પછી એની જોડે ખેંચાવીએ, 

એ પળો પાછી લાવીએ.

અંતાક્ષરી રમતાં રમતાં, 

બેસુરા ગીતો સંભળાવીએ, 

એ પળો પાછી લાવીએ.

માલદડી અને પકડદોડમાં, 

આખા ગામને હંફાવીએ, 

એ પળો પાછી લાવીએ.

આખા દેશની સમસ્યાઓને, 

એ ઓટલે બેસી પતાવીએ, 

એ પળો પાછી લાવીએ.

ફરી પાછા સાવ નવરા પડીને, 

દેશ વિદેશની રણનીતિ ચર્ચાવીએ, 

એ પળો પાછી લાવીએ.

શાળાએ જતા જતા કો'કને, 

થેલો હાથમાં પકડાવીએ, 

એ પળો પાછી લાવી.

રસ્તામાં આવતા વડલાની મૂછે, 

ગોળ પૈડા મજાના લટકાવીએ, 

એ પળો પાછી લાવીએ.