એય ચિતડા
એય ચિતડા
એય... ચિતડા...
શું કાંતે છે ઝીણું ઝબાક મન માલીપા,
એય ચિતડા...
જીવતરના તારોને અવળા વિટ્યા છે આલીપા.
રામ - રખોપા મોટા સમજી ઘર બારે તું જાતો,
ડગલે - પગલે ઠોકર લાગે અહમ નહિં સમજાતો,
એય... ચિતડા...
સાચા - ખોટા ચકરાવામાં ઘૂમે છે ખાલીપા.
ગુરુ ચરણમાં જઈને બેઠો શબદ ન એકે જાણ્યો,
ધૂમ મચાવી, રંગ જમાવી, રંગ ન એકે માણ્યો,
એય... ચિતડા...
ચપટી અજવાળાથી ખીલશે ફુલમાં ઝાકળટીપાં.
રામ - રહીમ કે અલ્લા - ઈશ્વર એક તત્વ છે અંદર,
પળને પળમાં જાણે નહીં તો દેખે નહિ સમંદર,
એય.... ચિતડા...
સત્ય - પ્રેમ ને કરુણા સર્જે કણકણમાં રાજીપા.