અંદરના ઓરડામાં

 અંદરના ઓરડામાં સૂતેલી એકલતા
આવીને ઊભી છે બારણે
અંદરના ઓરડેથી આંગણામાં
આવેલી કોરીકટ ચિઠ્ઠી મેં વાંચી
મીરાંની જેમ સાવ બ્હાવરી બનીને
પછી અલબેલી આંખડીઓ નાચી
આંગણામાં ઉપણીને ઢગલાબંધ ઊર્મિઓ
ચાળી મેં અંતરના ચારણે,
કૂકડાની કૂ સાથે ઝટ દઈને જાગી ગઈ
વર્ષોથી પોઢેલી વેદના
ઉપરથી પથ્થર સા હૈયાને ફોડ્યુ તો
અંદરથી પ્રગટી સંવેદના
આકાશે વાદળ ના કાટકો ના વીજ તોયે
ટહુકી ગ્યો મોર કિયા કારણે
અંદરના ઓરડામાં સૂતેલી એકલતા
આવીને ઊભી છે બારણે