રહ્યા છે રસ્તા

લાલચ બતાવી સૌને તાગી રહ્યા છે રસ્તા,
છે કેટલું મનોબળ માપી રહ્યા છે રસ્તા.

બસ ઝાંઝવાને કાજે વણથંભી જાતરા છે,
જાણે છતા અવિરત ચાલી રહ્યા છે રસ્તા.

ખુદને કરે સવાલો ને ખુદ ગળે જવાબો,
ના જાણે કેમ ખુદથી નાસી રહ્યા છે રસ્તા.

કેવા શુકનમાં પહેલું પગલું ભર્યુ હશે કે,
મંઝિલ નથી મળી પણ હાંફી રહ્યા છે રસ્તા.

છે થાક ને તરસનો સંયોગ કુંડળીમાં,
બિલ્લોરી કાચ લઇને ભાખી રહ્યા છે રસ્તા.

કાંટા ને કાંકરા દે, ખાડા ને ઠોકરો દે,
લટકામાં દઈ વળાંકો ડારી રહ્યા છે રસ્તા.

હરએક નામધારીનો નાશ છે પરંતુ,
ખુદના અમરપટાથી થાકી રહ્યા છે રસ્તા.