જીવતર પગભર હતું મા

તારા શ્વાસે તો અમારું આ ધબકતું ઘર હતું મા

સુખી છાલકથી છલોછલ આંગણે સરવર હતું મા

 

ધોમધખતા સૂર્ય શાપિત ગ્રીષ્મમાં છાંયો હતી તું

વહાલનું વાદળ વરસતું શ્રાવણી ઝરમર હતું મા.

 

દુ:ખમાં પણ શાતા મળતી: કેમ કે તું તો હતી ને?

તારી ટેકણ લાકડીથી જીવતર પગભર હતું મા.

 

યાદ આવે છે મને હાલરડા ને જાગી જવાય છે;

સ્વપ્નમાં તારું મલકતું મુખડુ મનહર હતું મા.

 

જિંદગીના દાખલાઓ ખુબ સારી રીતે ગણ્યા;

જીંદગાનીનું ગણિત રસભર અને સરભર હતું મા