ના શકું

એવું કોઈ સ્વપ્ન આપ કે હું જાગી ના શકું,
એવું કોઈ બંધન આપ કે હું ભાગી ના શકું.

દર્દ હશે તો તારી દયા રહેશે સદા મારા પર;
એવું આપ દર્દ કે ક્યારેય હું ત્યાગી ના શકું.

સિતમનો અહેસાસ કરાવવા એવું કર ખુદા,
કે તે ચાહે તો પણ તેને હું માંગી ના શકું.

મોહબ્બતની હોય કદાચ આ અસર દોસ્તો,
કે પહેલા હતો એવો હવે હું લાગી ના શકું.

સિતારા ને ગગન સુધી પહોંચી જઈશ પણ
નિશાન એવું ના આપો કે હું તાગી ના શકું.

ખુલ્લી આંખે દેખાય છે માત્ર ચહેરો કોઈને,
દુઆ માંગજો કે વધુ સમય હું જાગી ના શકું.

મળ્યા છે હજારો સંબંધો ઉધાર આ જગમાં,
કરજ બાકી છે માટે અહીથી હું ભાગી ના શકું.

માન્યું કે ફૂલ છું પણ પાંદડીઓ ધારદાર છે;
એવું ના માનજો કે કોઈને હું વાગી ના શકું.

હવે સમજાયું હ્રદયને પથ્થર કેમ કર્યું “અંકિત”,
કે તેની અંદર તારી છબી હું ભાંગી ના શકુ.