શિક્ષક વંદના
શિક્ષક વંદના
જેના થકી જીવન જંગે મળતી રે જીત,
એ શિક્ષકનું આજ મારે ગાવું છે ગીત.
શિતળતા ચંદ્ર સમી, આહલાદક લાગે,
સઘળા સંતાપ એના સ્પર્શ થકી ભાગે,
જીવન ખીલવવાની શીખવે એ રીત,
એ શિક્ષકનું આજ મારે ગાવું છે ગીત.
ક્ષમતા ભરપૂર એમાં, જ્ઞાન અને કર્મની,
મમતાથી શીખવાડે વાતો સ્વધર્મની,
સક્ષમતા શિષ્યોમાં કરતા સંચિત,
એ શિક્ષકનું આજ મારે ગાવું છે ગીત.
કઠોર બને વજ્ર સમા, કર્તવ્ય કાજે,
એમની જ્ઞાનાગ્નિથી ઉન્મત્તતા દાઝે,
તેજપુંજથી એના થાતું જગ આલોકીત,
એ શિક્ષકનું આજ મારે ગાવું છે ગીત.
મુજ સમા મૂરઝાયેલ પુષ્પો ખીલવ્યા,
માળી બની, કેટલાયે ઉપવન શણગાર્યા,
પ્રસારશું સુગંધ, જગ કરશું સુવાસિત,
મારા શિક્ષકને વંદન કરે છે મારૂં ગીત.