જીવનમાં પાનખર આવે છે

સાથીઓથી છુટાં પડવાની મોસમ આવે છે,

ઉનાળો આવે, ને જીવનમાં પાનખર આવે છે.

ઘટાદાર શાળા પર કૂમળા પાન જેવા હોય,

તોય ત્યાંથી ખરી પડવાની મોસમ આવે છે,

ઉનાળો આવે, ને જીવનમાં પાનખર આવે છે.

મજાક-મસ્તી કરવાની હજી મજા આવી હોય,

ત્યાં એને યાદો બનાવી દેવાની મોસમ આવે છે,

ઉનાળો આવે, ને જીવનમાં પાનખર આવે છે.

જે ડાળીએ બેસી રોજ ગીત નવાં ગાયા હોય,

એ ડાળીથી વિખૂટાં પડવાની મોસમ આવે છે,

ઉનાળો આવે, ને જીવનમાં પાનખર આવે છે.

'અર્જુન’ને માંડ પક્ષીની આંખ દેખાઈ હોય,

ત્યાં ગુરુ દ્રોણથી રજા લેવાની મોસમ આવે છે,

ઉનાળો આવે ને જીવનમાં પાનખર આવે છે.