કોણ ચાહે છે તને ?

શું કરીશ જાણી ખરેખર કોણ ચાહે છે તને?
તુંય જાણે છે જીવનભર કોણ ચાહે છે તને?

તે છતાં કેવળ કરુણા પ્રેમ વરસાવે સતત
આ જગતમાં બોલ ઈશ્વર, કોણ ચાહે છે તને?

હા, ઘડી કે બે ઘડી જોવો કિનારા પર ગમે
એ કહે હરપળ સમંદર કોણ ચાહે છે તને?

ખૂબ માનીતો બધાનો તું શિખરથી ખીણ લગ
પણ કદી જો ખાય ઠોકર કોણ ચાહે છે તને?

નામ ઝળહળતું બધાના હોઠ પર રમતું છતાં
જાય જો વીતી એ ઉંમર કોણ ચાહે છે તને?

ને નથી જો કોઈ પણ હા ચાહતું જો 'હર્ષ' તો
કૈંક જન્મોથી નિરંતર કોણ ચાહે છે તને