ચેકમેટ
ચેકમેટ
શતરંજની રમતની બિછાવી જાળ,
શ્વેતરંગી અને શ્યામરંગી ચોસઠ ખાનાઓની માયાજાળ;
લશ્કર એટલે હાથી, ઘોડા, ઊંટ ને પાયદળ,
તો વજીર એ રાજા નું મનોબળ.
દરેકની ચાલ છે અલગ અલગ,
વજીરની ચાલ સૌની મિલી ભગત;
હાથીની ચાલ સીધી, તો ઊંટની છે ત્રાંસી,
પાયદળ ચાલે બે ડગલાં ને ઘોડાની ચાલ અઢી;
વજીર ફરે ચોતરફ, રાજાની છે મર્યાદા,
ચારે દિશામાં એક એક ડગલું એ એની આવરદા.
સૌ છોડી જાય જ્યારે સાથ,
રાજા લડે ત્યારે એકલે હાથ;
ઘેરાઈ જાય રાજા જ્યારે ચોતરફથી,
થઈ જાય ત્યારે એ ચેકમેટ.
આવી જ દશા છે જિંદગીની;
પોતાના જ્યારે છોડે સાથ,
ત્યારે માનવીની જિંદગીની બાજી,
થઇ જાય શતરંજના રાજાની જેમ ચેકમેટ.