મેઘલા વાદળો
મેઘલા વાદળો
આવી રહયો છું હું જલદી,
કહેજો મારી પ્રિયતમાને, દુ:ખી ન થાય લગાર,
મેઘલા વાદળો એ આજ આપ્યો અણસાર.
ચાતક હવે બસ થોડી જ વાર,
સંભળાઈ રહયો મને રાગ મલહાર,
મેઘલા વાદળો એ આજ આપ્યો અણસાર.
તારી તૃષ્ણાની હું કરીશ તૃપ્તિ,
તારા મિલનના સજાવી નવલા શણગાર,
મેઘલા વાદળો એ આજ આપ્યો અણસાર.
મયુર પંખ ફેલાવી થનગને ચારેકોર,
વનરાજીમાં ખુશ થઈ કોયલી કરે ટહુકાર,
મેઘલા વાદળો એ આજ આપ્યો અણસાર.
મન ગમતી મેઘાનું નામ સાંભળી,
પ્રેમીઓના હૈયા મલકાય ને હરખાય,
મેઘલા વાદળો એ આજ આપ્યો અણસાર.
રાધા રાહ જોઈ તારી બ્રિજવનમાં
માધવની મોરલીના સૂર સંભળાય,
મેઘલા વાદળો એ આજ આપ્યો અણસાર.