સાંભળવી હતી
સાંભળવી હતી
રણ વચાળે રણ વિશેની વાત સાંભળવી હતી
યુધ્ધનાં કારણ વિશેની વાત સાંભળવી હતી
આ નગરનાં લોક લડતાં જાય ને હું મૌન છું
બસ મને હણહણ વિશેની વાત સાંભળવી હતી
સાવ ખાલી થૈ જવું સ્હેલું નથી એ જાણવાં
અધમરી માંગણ વિશેની વાત સાંભળવી હતી
આ હૃદયનો એક કટકો મેં વળાવ્યો એ પછી
પારકી થાપણ વિશેની વાત સાંભળવી હતી
એટલે ખોલીને બેઠી હું ય અલ્મારી જૂની
આજ બસ રણઝણ વિશેની વાત સાંભળવી હતી
તેં જે પેટારે પૂરેલી વારતાનાં અંતમાં
ભૂખની ડાકણ વિશેની વાત સાંભળવી હતી
દંભનાં મ્હોરાં ઉતારી સાચને આગળ કરે
એક એ દર્પણ વિશેની વાત સાંભળવી હતી