અષાઢી સાંજ
અષાઢી સાંજ
આ અષાઢી કોરીધાકોર સાંજ એવી ઢળતી,
ઝીણી ઝીણી ધૂળની ડમરી ઊડી આભે ચડતી.
બળબળતા બપોર વેળા લૂ ઊની ઊની વાતી,
ચોળી ચોળી આંખો રાતી રાયણ જેવી થાતી;
ઝાંખુ - પાંખુ ભાસે સઘળું નજર ના ઉઘડતી,
સૂકી સૂકી રેતી રણની અંગે અંગમાં ભળતી.
આ અષાઢી કોરીધાકોર...
ભાગોળે વરતાય ભણકારા ભેંકાર એવી પડતી,
ને પાંખારો પવન લેતો ગામ આખાની ઝડતી;
વરસે ના કોઈ વ્યોમ વાદળી અમથી રે ગગડતી,
મેલી -ઘેલી આશા આઘી-પાછી થૈ ટળવળતી.
આ અષાઢી કોરીધાકોર...
માંડ્યા છે મંડાણ મેહુલિયે દૂર ક્ષિતિજે જાણી,
કોરી કોરી લાગણીઓ લથબથ થૈ ભીંજાણી;
શ્રાવણી એ ઝરમર વાછંટ મનમહીં ખળભળતી,
ભીતર હૈયે એક નદી સાવ ખાલી ખળખળતી.
આ અષાઢી કોરીધાકોર...