બારમાસી ગીત
બારમાસી ગીત
આપને આપી મને ઈશે પૂરી કરી મારી માનતા સખી;
આંખો આપની દ્રષ્ટિ અમારી : સપના ખુબ ફળતા સખી.
‘કારતક’ના કામણગારા દિવસ ગણતા સખી;
કોડ મારા એમ પૂરા તમે કરતા સખી.
‘માગશર’ની મઘમઘતી મનહર રાતમાં;
રાત રાણી મોગરાના ફૂલો ઝરતા સખી.
‘પોષ’ની હાડ થીજાવતી ઠંડી શિશિરે;
એક રજાઈમાં સંગ સંગ થરથરતા સખી.
‘માઘ’ની મધ્યાહ્નને અમે ચોર્યા ટહુકા કોકિલ;
પંચમ સૂરે “ટહુકા પાછા આપો” કરગરતા સખી.
ફોરમતા ‘ફાગણ’ના પહેરી છોગાં આવ્યા તમે;
ખુદ થઈ બેહોશ હોશ ઉડાડી નિંદર હરતા સખી.
‘ચૈત્ર’ની બળબળતી ચાંદનીથી જો બદન બળે;
ચંદનનો લેપ લઈ ખુદ અમ સન્મુખ ધરતા સખી.
બળબળતી ‘વૈશાખ’ની ધગધગતી ઉષ્ણ બપોરે;
વારંવાર ડંખીલા શીતળ સ્પર્શથી કનડતા સખી.
‘જેઠ’માસે વટથી વ્રત કરતા અમ સખી સાવિત્રી;
ભજન કીર્તન હરતા ફરતા કરતા સલુણા સખી.
‘અષાઢ’ની મેઘલી ભેજલ રાત્રીના ગાઢ અંધકારે;
વીજ ઝબકારે અચાનક પ્રકટ થઈ ઝળહળતા સખી.
'શ્રાવણ’ની એક ધારે એકધારું ભીંજવતી મેઘ કન્યા;
મનમાં મન પાંચમનો મેળો રચી મહાલતા સખી.
‘આસો’માં અવસરના આસોપાલવ બારસાખે બાંધી;
શક્તિ રૂપેણ કુમ કુમ પગલે અમ ઉરે સંચરતા સખી.