ગેબી શખ્સ
ગેબી શખ્સ
કોઈના પણ
સંસર્ગમાં આવ્યા વિના જ
ગર્ભાધાન વિના જ
સમય નામનો કોઈ ગેબી શખ્સ
કેટલાં યે વરસોથી
મૂક્યાં કરે છે
ઈંડાં પળેપળ;
પરભૃત્તિકા પેઠે જ !
ઈંડાં પછી ઈંડાં; ઈંડાં પછી ઈંડાં
વળી વળી ઈંડાં
મૂકી
પ્રત્યેક પળે છટકતો
ક્યાંક સરી જાય છે !
ન માળો; ન ગરમાળો; ન આંબો; ન ડાળો; ન પાળો; ન તાળો; ન ગાળો- ગોટાળો
દરિયાની
તમામ માછલીઓને
પકડી લેવાં એકસામટી જ
વણતો રહે છે જાળો
લાલ; પીળો; લીલો; કાબરચીતરો કે કાળો
સહસ્રશિર્ષમન્વયે; સહસ્ર નેત્રાય; સહસ્ર પાદાય; સહસ્ર બાહવે !
નામ છે -- ખાલી છે; આંખ છે--પ્યાલી છે; ખાલી છે
જાહોજલાલી છે !
એકલતા પ્યારી છે; સંગત નોંધારી છે;
ડારી છે
ભીતર કંઈક ભયંકર મારામારી છે.
એક છે; અનન્ત છે; એકમેક એક છે
તેગ; તેગ; તેગ છે
ઘાટીલો વેગ છે
ખાલીખમ-ખાલીખમ મસમોટી દેગ છે !
લાક્ષાગ્રહી લહાય વચ્ચે
અંધારાં ચૂંટ્યાં'તાં; લૂટ્યાં'તાં
અંધારે છૂટ્યા'તાં
ફળફૂલ ચૂંટ્યાં'તાં; હરણાંઓ વેડ્યાં'તાં; રાધ્યાં'તાં
સૌએ મળી ખાધા'તાં
એકમેક ડૂબ્યા'તાં; તરતા'તાં; ફરતા'તાં
ધોમધોમ ઉનાળે
ખુલ્લી બપોરનાં પડખાંઓ ઘસતા'તાં
કુન્તાની વાડી છે
ગૂંગાની વાણી છે !
રામ છે; રહેમાન છે; ઈમાન છે; ગુમાન છે
ઉપર આસમાન છે
નીચે અવમાન છે
જમણે સુલેમાન છે
ડાબે કમાલ છે !
ચિત્ત સંભ્રાન્ત છે; જાત હનુમાન છે
થોડું અનુમાન છે
ઝાઝો વિ-રામ છે
સામે વેરાન છે !
હાલ મવાલી ને જેબ હજું કાણી છે
કાણી ને ખાલી છે
આપણી યે વાણી છે
એજ તો કમાણી છે
રાજા ને રાણી છે
સાલ્લી
પરજાય થોડી શાણી છે !
પાણી છે; પાણી છે; પાણી છે; પાણી છે
આંખોનાં પોપચાંમાં પોતીકાં પાણી છે !
દોરવાયા દોર્યાં'તાં; સારાને મૂક્યાં'તાં
નરસાંને ઝૂક્યાં'તાં
ડૂક્યાં'તાં
ઘેટા ઉછેર્યાં'તાં
વિચારી; વિચારી
લાં
બુ
લ
ચ
વિચારી પાળ્યાં'તાં
ટપકેલાં ઈંડાંઓ;
મસમોટાં મીંડાંઓ
કીડાંઓ; કીડાંઓ; કીડાંઓ;
પાળી'તી પીડાઓ---
ઘેટાંને ગણવામાં
ખણવામાં
જણવામાં
હાર્યા- હરાવ્યા'તાં
સિંહ સમા હાર્યા'તાં !
ઈંડાથી ઈયળ;
ઈયળથી કોશેટો
કોશેટો બનતું પતંગિયું
રસ્તે અટવાયા'તાં; અટક્યાં'તા
અટકેલાં; ભટકેલાં; મૂંઝેલાં ઊભા'તાં
ત્યારે
અત્યારે
અબીહાલ પણ
કેટલાંયે વરસોથી
મૂક્યાં કરે છે
ઈંડાંઓ; પ્રતિક્ષણ--
કોઈ ગેબી શખ્સ !