આઝાદી માણીને જો
આઝાદી માણીને જો
ઈર્ષાના કાંટાઓ ફોંરીને જો,
એકવાર જાત તારી વાવીને જો,
નાતોને જાતોને છોડીને જો,
આઝાદી શ્વાસોની માણીને જો.
શાને તું રોદણાં રડે છે રે રોજ,
બીજાના દુખડામાં ડૂબીને જો,
બીજાની કાઢે છે ભૂલો તું રોજ,
તારી એ ભૂલોને ત્યાગીને જો.
અપમાનો લોકોના ભૂલીને જો,
અંદરના દરવાજા ખોલીને જો,
તારી લીટી થોડી ભૂસીને જો,
જીતેલી બાજી ને હારીને જો.
રોતાં બાળકને હસાવીને જો,
તારામાં બાળક રમાડીને જો,
દિલના દરવાજા ને ખોલીને જો,
અંતરના નાદ તું વગાડીને જો.