વસંતના રંગે રંગાવું
વસંતના રંગે રંગાવું
વસંતના વાયરાને, ડોલે વનરાજી એવા,
ભવમાં રાજી રાજી થાવું... રે...
વાહલા મારે વસંતના રંગે રંગાવું !
આંબા ડાળે ઓલી, કોયલ બોલે એના<,
સાદે જગ ભૂલી જાવું,
ગામની સીમે ઓલ્યો, મોરલો નાચે એની,
સંગ સંગ હું ઝૂલી જાવું... રે...
વાહલા મારે વસંતના રંગે રંગાવું !
રંગબેરંગી ઓલ્યા, ફૂલને પતંગિયાંનાં,
રંગે મારે ચીતરાવું,
કેસુડાંના ફૂલને, પાણીમાં પલાળી એનાં,
ભગવા રંગે ભીંજાવું... રે...
વાહલા મારે વસંતના રંગે રંગાવું !
ગુનગુન કરતાં ઓલ્યા, ભમરા આવે એને,
ફૂલરસ હું પીવડાવું,
ફાગણ લાવે ઓલી, યાદો વિજોગણની,
યાદોમાં જાત નવડાવું...રે...
વાહલા મારે વસંતના રંગે રંગાવું !
તરુવરે મંજરીને આવે લીલા પાન થાય,
આખું મલક હરીયાળું,
ભવને ભૂલી હું તો માણું કુદરતને વાહલા,
જીવન થાય રઢિયાળું...રે...
વાહલા મારે વસંતના રંગે રંગાવું !
વસંતના વાયરાને, ડોલે વનરાજી એવા,
ભવમાં રાજી રાજી થાવું...રે...
વાહલા મારે વસંતના રંગે રંગાવું !