દીકરીની વ્યથા

થોભીજા દાક્તર

સાંભળ

મારે નવી દુનિયા જોવી સે

સફરજન જેવો સુરજ

અને

રોટલા જેવો ચંદર જોવો સે

ભઈલાની જેમ કાલુ કાલુ બોલવું સે

આંગણામાં ઝાંઝરી પહેરી

બહેનપણી સાથે

ઠાકલા દા અને પાંચીકે રમવું સે

પાટીમાં ક ખ  ગ ઘ લખવા સે

કારણ કવ

વકીલ થવું સે

કાયદો ઘડવો સે

ઈશ્વર સામે કેસ કરવો સે

ઈટથી ઈટ બજાવી દઈશ

ઈશ્વરને પૂછવું સે

ગુનો શું કર્યો સે

કે

મારી માતાની કૂખમાં જ

ગળું ઘોટીને મારી નાખે સે...

જલરૂપ મારે તો

ઈશ્વર પાસેથી

જવાબ માંગવો સે.