કોને આવરણ ??
કોને આવરણ ??
જ્યારથી પણ
કોઈ તેજ પુંજમાંથી
છૂટું પડ્યું હશે,
જગત આ ત્યારથી,
નગ્ન છે આમનું આમ જ.
કોઈ પરિધાન વગર રખડે છે બધે સહજ,
કોઈ રંગે એના
ઘાટીલા દેહને કરવા રૂડો,
હિમંતે ય ના કરી !
એને જરૂર પણ શું એવાં કોઈ આવરણની,
જેનાથી એ છુપાવી શકે સ્વભાવ એનો ?
કોતર, ખીણ કે ઝરણાને
ક્યારેય આભૂષણ - વસ્ત્રની જરૂર ન પડી ?
એ સુંદર છે ,
કારણ, એ નગ્ન છે.
એ જ ક્લબલતું ઝરણું સહજતાથી ભળીને
સાગરમાં,
નગ્ન જીવેને નગ્ન ભળે છે,
કોઈ પરવા વગર,
કોઈ રોકટોક વગર.
ને ચર્ચા કરે પણ કોણ ?
જ્યાં સ્વીકાર છે નગ્નતાનો,
આડંબર વગર,
પક્ષીની ચાંચથી,
સિંહણના નોર, સ્વીકાર્ય છે નગ્ન.
છુપાવી શકાય નહીં એ નગ્નતા
કોઈ આવરણમાં,
નગ્નતા છુપાવી જાણે છે માણસ.
માત્ર માણસ.