એકવાર તું મારી પાસે તો બેસ !

સદ્યસ્નાતા, સંવારતી વિખરાયેલા ભીના કેશ

ગુલાબી હોઠ ને કાળા નયન, વિના મેશ

ગૌરવર્ણ છતાં સાદગી હંમેશ

એકવાર તું મારી પાસે તો બેસ ! 

અધૂરપ હતી જીવનમાં, થયો તારો પ્રવેશ

મધુરપ છવાઈ ગઈ જાણે સૂરમય રાગ દેશ 

તારા વિના સૂનો હતો મારા દિલનો નેસ

એકવાર તું મારી પાસે તો બેસ ! 

તું જ મારી કવિતા ને તું જ મારી ગઝલ

તારા વિના અઘરી હતી આ લાંબી મઝલ

સંભાળતી તુરંત, વાગતી જો મને ઠેસ

એકવાર તું મારી પાસે તો બેસ ! 

અંધારા ને અજવાળામાં તારો સદા સાથ

ચાર દાયકાનો પ્રિયે ! લાગણીસભર સંગાથ

જન્મોજનમનો સથવારો માગું, નો મોર નો લેસ

એકવાર તું મારી પાસે તો બેસ !