ગીતોમાંથી ગઝલો ફૂટી,

યાદ તમારી તાજી થઇ ગઈ,
સહરામાં વનરાજી થઇ ગઈ

દિલ જાતે વેંચાવા નીકળ્યું,
આંખોની હરરાજી થઇ ગઈ.

બોલો..બોલો..કંઇ તો બોલો
એવી શું નારાજી થઇ ગઈ?

હાથ પકડ્યો એનો ત્યાં તો, 
દુનિયા આખી કાજી થઇ ગઈ!

ઈચ્છા ધબ-ધબ નીચે ઉતરી,
આબુથી અંબાજી થઇ ગઈ!

ગીતોમાંથી ગઝલો ફૂટી,
લ્યો, સાળી જીજાજી થઇ ગઈ!

એણે એક જ પત્તું ફેંક્યું,
મારી આખી બાજી થઇ ગઈ!

દીકરા માટે માગું આવ્યું,
મમ્મી રાજી-રાજી થઇ ગઈ.

આ તે કેવું શૂરાતન કે-
બીડી પણ શિવાજી થઇ ગઈ!

'નિનાદ' ગઝલો લખવી એ તો,
ઘર-ઘરની ધોરાજી થઇ ગઈ.