ચૂંટણી આવી

(કટાક્ષગીત)

ચાલ, મનુડિયા ચૂંટણી આવી, આપણા માટે તો જલસા લાવી; ચાલ, મનુડિયા.....

એક પક્ષના આવી આપશે પચાસ,

બીજા સો આપી મત માગશે ખાસ;

કોઈ વળી બસો જશે પકડાવી, ચાલ, મનુડિયા.....

રોટલાનાં બટકાં ખાઈ કંટાળ્યા,

એક મહિનો નવા નાસ્તા આવ્યા; લઈએ મોજની જિંદગી વધાવી, ચાલ, મનુડિયા.....

ઈંગ્લીશના પેગની આવશે મોજ, પછી ક્યાં મળવાનું છે રોજેરોજ? પછી કોણ દેશે બારણું ખટખટાવી,

ચાલ, મનુડિયા.....

અત્યારે તો ભાઈ, કરશે લ્હાણી, મીઠી-મીઠી તેઓ બોલશે વાણી; પછી તો સઘળું લેશે પડાવી, ચાલ, મનુડિયા.....